Leka Sampi

Enti kita nyau nyadoh ka tubuh bebai pulai nandang,
Anang kita enda ngelua ka belili leka dabong raang,
Engkah ka kita atas chapak ke lelidak atas tikai,
Awak ka dikena aku nyabang ubat pandai.
Enti tusui aku ditu bisi salah enda manah,
Anang kita mantah enggau dilah dabung landai.
Anang Kita ngemalu ka tudah aku di lempedu tangkai kamai.
Laban aku endang enda tau ngelulu ka kita ngena jaku nyampau dirintai.
Aku ga semina nampung jaku orang ke dulu udah danjan,
Ngagai batang Mandai Rawan.
Aku ga endang deka nguji nitih ka ripih adat Iban,
Niti nali nampung adat sida Aki Lang Menaul Buban.
Enggau tu aku arap ka kita Gayu-guru ku Sentuku,
Gerai nyamai ku Selampandai,
Nadai apa, nadai nama ku Petara.
Kitai tu sama-sama nampuk ngagai Tuchung Rabung Benama,
Ngambika kitai jelai rita nguan menua.
Terima Kasih ngagai samua kita ti rindu ka penemu lama,
Arap ka kitai tau betemu jemah ila.