Pengerindu ti udah ditanggam dalam pengelama setaun lenyau bakanya aja...
Pengerindu putus, puntan di tengah jalai.
Penyayau lenyau, lela ditaban k jam, dibai ari ke silih beganti.
Ukai ku minta utai bakatu nyadi, tang bangat enda ulih dipajak ke ati ti suah amat lebu, suah asa.
Dah puas ai mata labuh naya, nerutu baka leka ujan lemai ari ketegal penusah ati ti enda ulih ditiu ngena leka jaku.
Bendar meh kenu ko anak ati ka ngetan ke pengerindu tu, ngarapka mujur panjai begulai nyentuk ke jemah ila tang nadai meh daya ti sigi udah diatur Petara naka tu aja.
Mayuh amat meh pengingin ati, besai amat meh pengarap ati ti deka begulai sejalai, idup sekunsi ba dunya injau ti diberi Petara.
Ko jaku tua ka idup begulai sama baka urang bukai. Nirika ruang bilik diri empu...
Tang, janji nya semina tinggal janji. Nadai jalai meh deka ngamat ke semua janji, semua pengingin ati ngelamatu lesap pia aja.
Minta ampun laban aku ti dulu mutus ka semaya janji. Aku ti ngasuh semaya tua balang.
Perangai nuan jauh amat dah berubah diatu. Ba mua urang baka ke manah, mentas enggau aku tang ulah nuan, perangai nuan jauh amat udah nyelai.
Nuan sengaja ngereja pengawa ti ngasuh aku pedis ati.
Nadai nuan ngira ati ku ditu. Peneka nuan ngereja semua pengawa. Enggai dirara, enggai ditagang. Enda tau dipadah. Alu ringat, alu madah kediri empu jai.
Penyalah nuan empu ke ngasuh aku berubah. Ngasuh pengerindu betukar benci. Ngasuh penyayau aku lenyau, leju.
Ari suba nuan bejanji deka berubah. Tang, janji semina tinggal janji.
Anang bejanji enti enda ulih ngamat ke iya.
Nadai guna bejanji enti semina deka ngambi ati pangan diri aja.
Nuan semampai nuduh, nyangka aku malu bepangan enggau nuan.
Sapa malu ke bendar iya??? Aku tauka nuan???
Ngelamatu aku ngasul kediri empu, enda nemu malu.
Ngiga nuan, mai nuan betemu tang nuan mayuh alasan. Mayuh penanggul.
Nuan ke enda berani betemu, begulai enggau aku.
Nama kebuah???
Nuan bisi urang bukai ka??
Beterus terang aja meh enti udah enggai.
Pedis amat bakatu.
Kapa ati enda lebu, asa ngenang pengerindu ti puntan, semaya ti balang.
Tu meh pengerindu ti nadai penyangkai...
No comments:
Post a Comment